शिवशिखर बहुउद्देश्यीय सहकारी संस्था संघर्ष समिति रत्ननगरले मंगलबार पत्रकार सम्मेलनको आयोजना गरी सरकारी प्रयास गर्दा पनि सञ्चालकहरु रकम फिर्ताका लागि सकारात्मक नभएपछि उनीहरुविरूद्ध सामूहिक उजुरी दिन लागेको जनाएको छ । जेठ २२ गते जिल्लाका सम्पूर्ण पीडितहरुको विवरण संकलन गरी संस्थागतरुपमा प्रहरीलाई जाहेरी दिने तयारी गरिएको छ । स्थानीय सरकारका प्रमुखसहित जिल्ला प्रशासन कार्यालय तथा गृहमन्त्रीसमेतलाई ध्यानाकर्षण पत्र बुझाएर रकम फिर्ताका लागि पहल गरिदिन संघर्ष समितिले आग्रह गरेको थियो ।
जिल्ला प्रहरी कार्यालयमा उजुरी दर्ताका लागि शेयर सदस्य र बचतकर्ताहरुको विवरण संकलनको काम भइरहेको संघर्ष समिति रत्ननगरका अध्यक्ष सुरेशजंग पाण्डेले जानकारी दिए । रत्ननगरमा एक हजार १५० र भरतपुरमा १ हजार ५०० बढीको विवरण संकलन भएको उनले बताए । विवरण संकलनको काम तीव्ररुपमा भइरहेकोले विवरण बुझाउन बाँकी रहेका शेयर सदस्य तथा बचतकर्ताहरुलाई तत्काल सम्बन्धित शाखामा विवरण बुझाउन उनले आग्रह गरे ।
चितवनमा २०७७ साल कार्तिकमा शाखा कार्यालय सञ्चालन भएको सो सहकारी २०७९ माघ महिनामा बन्द भएको थियो । शेयर सदस्य र बचतकर्ताले रकम फिर्ता माग्न थालेपछि कार्यालय बन्द गरी सञ्चालक फरार भएका थिए । रत्ननगरस्थित शाखा कार्यालयमा ४ हजार ८०० शेयर सदस्य तथा बचतकर्ताहरुबाट सो सहकारीले २४ करोड तीन लाख २७ हजार रूपैयाँ संकलन गरेको छ । त्यसैगरी, भरतपुर शाखामा ८ हजार ६४ शेयर सदस्य तथा बचतकर्ताहरुबाट ६४ करोड रूपैयाँ बचत संकलन गरेको छ ।
रत्ननगर शाखामा शेयर रकम र बचत संकलन गरी २४ करोड तीन लाख संकलन गरेको सो सहकारीले १ करोड ४५ लाख रूपैयाँ मात्र लगानी गरेको पाइएको संघर्ष समितिका संयोजक पाण्डेले जानकारी दिए । पूर्वी चितवनका चार नगरपालिकाका शेयर सदस्य र बचतकर्ताहरुबाट संकलन भएको २४ करोड तीन लाखमध्ये १६ करोड ८० लाख रूपैयाँ स्थानीयस्तरमा लगानी नगरी केन्द्रीय कार्यालय लगेको पाइएको उनले बताए ।
स्थानीयस्तरमा १२ देखि १३ करोड लगानी गरेको भए अहिलेको अवस्था नआउने उनको भनाइ छ । ‘शिवशिखरमा आर्थिक सङ्कटको प्रभाव होइन’, संघर्ष समितिका संयोजक पाण्डेले भने, ‘जिल्ला–जिल्लामा बचत संकलन गर्ने र केन्द्रीय कार्यालयमा पैसा तान्ने गलत प्रकृतिका कारण सहकारी डुबेको हो ।’
देशभर ३६ शाखा कार्यालय सञ्चालन गरेको सो सहकारीका ४० वटा कम्पनी सञ्चालनमा रहेका छन् । सो सहकारीको अझै पनि १६ अर्बबराबरको सम्पत्ति रहेको पाइएको संघर्ष समितिले जनाएको छ । समस्याग्रस्त सहकारीबाट १४ अर्ब ५० करोड रूपैयाँ फिर्ता गर्नुपर्ने देखिएको संघर्ष समिति रत्ननगरका सहसचिव शंकर पौडेलले बताए ।
शिवशिखरपीडितहरुबाट चौतर्फी दबाब परेपछि सरकारले तीन जना सञ्चालकलाई काठमाडौँमा पक्राउसमेत गरेको छ । शिखर अर्गनाइजेसनकी अध्यक्ष गीता शर्मासहित सहकारीका सञ्चालकहरु अनिषराज भण्डारी र पुष्कर मल्ललाई प्रहरीको अनुसन्धान ब्युरोले पक्राउ गरी अनुसन्धान गरिरहेको छ ।
पत्रकार सम्मेलनमा संघर्ष समिति रत्ननगरका सचिव छाया तिवारी, सहसचिव शंकर पौडेल, कोषाध्यक्ष रुपा गिरी, सल्लाहकार नारायणप्रसाद अम्गाईं, सदस्यहरु रामकाजी श्रेष्ठ, मनोज चौधरी, उज्ज्वल श्रेष्ठ, राकेश कछडियालगायतको सहभागिता थियो ।
