रत्ननगर, वैशाख २० ।
पूर्वी चितवनको रत्ननगर नगरपालिकामा मोटरसाइकल अनियन्त्रित भई घरमा ठोक्किदा दुई जनाको मृत्यु भएको छ । मृत्यु हुनेमा रत्ननगर–३ बन्सी बस्ने २२ वर्षीय जीवन चौधरी र सोहि ठाउँ बस्ने १८ वर्षीय सुमित महतो रहेको प्रहरीले बताएको छ ।
बुधवार राति ११ः५५ बजेको समयमा रत्ननगर–४ वडा कार्यालय नजिक भित्री सडक खण्डमा जीवनले चलाएको ना २२ प ३४४४ नम्बरको मोटरसाइकल अनियन्त्रित भई स्थानीय सुमन गदालको घरको भित्तामा ठोक्किन पुगेको थियो । घरको भित्तामा ठोक्किएर गम्भिर घाइते भएका मोटरसाइकल चालक जीवन र मोटरसाइकलको पछाडि सवार सुमितको गएराति १२ः५५ बजेको समयमा भरतपुर अस्पतालमा उपचारका क्रममा मृत्यु भएको चितवन प्रहरीले जानकारी दिएको छ ।
मृतक दुवै जनाको शव भरतपुर अस्पतालको शवगृहमा राखिएको छ । मोटरसाइकल ठोक्किएर घरको भित्तामा समेत क्षति पुगेको र घटनाको विषयमा इलाका प्रहरी कार्यालय टाँडीले थप अनुसन्धान गरिरहेको छ ।
