गरिबी र पारिवारिक समस्यालाई पछि पार्दै कैलालीका १४ वर्षीय विद्यार्थी सुशील भण्डारीले आफ्नो पहिलो कथा सङ्ग्रह “घाम छायाँ” बजारमा ल्याएका छन्। सानै उमेरदेखि नेपाली साहित्यमा बलियो पाइला चालेका उनले कक्षा १० उत्तीर्ण गरेपछि अनेकौँ सङ्घर्षका बीच यो कृति प्रकाशन गरेका हुन्।

मूल रूपमा डोटीमा जन्मिएर हाल कैलालीको जोशीपुरमा बसोबास गरिरहेका सुशीलको बाल्यकाल प्रकृतिको काख र जङ्गलको बीचमा रहेको एकान्त घरमा बितेको थियो। सरकारी विद्यालयमा अध्ययनरत उनको परिवारको आर्थिक अवस्था अत्यन्तै कमजोर छ भने बुबा पनि लामो समयदेखि बिरामी रहँदै आएका छन्। सीमित स्रोतसाधन र यस्ता अनेकौँ पारिवारिक कठिनाइले पनि उनको साहित्यप्रतिको अगाध लगावलाई कहिल्यै मर्न दिएन।

निरन्तरको मेहनतपछि प्रकाशित १५२ पृष्ठ लामो यस कथा सङ्ग्रहमा समाजका विविध पक्ष, गरिबी, सङ्घर्ष, मानवीय संवेदना, आशा र निराशाका साथै जीवनको यथार्थलाई गहिरोसँग उतारिएको छ। यस पुस्तकले पाठकलाई कथा पढाउने मात्र नभई जीवनलाई बुझ्ने नयाँ दृष्टिकोणसमेत प्रदान गर्ने प्रयास गरेको छ।

प्रतिभा र दृढ इच्छाशक्ति भए जस्तोसुकै कठिन परिस्थितिमा पनि सफलता सम्भव छ भन्ने सन्देश दिँदै सुशीलले सुरु गरेको यो साहित्यिक यात्राले भोलिका दिनमा कस्तो उचाइ लेला भन्ने कौतूहल सबैमा जगाएको छ। भविष्यमा पनि साहित्यिक सिर्जनालाई निरन्तरता दिँदै नेपाली साहित्यमा आफ्नो छुट्टै पहिचान बनाउने लक्ष्य बोकेका यी बाल प्रतिभाको यो लोभलाग्दो प्रयास धेरै युवाहरूका लागि ठूलो प्रेरणाको स्रोत बन्न सक्छ।