चितवन, ८ जेठ ।

नेपाल रेडक्रस सोसाइटी रत्ननगर उपशाखाको आयोजनामा तीन दिवसीय समुदायमा आधारित प्राथमिक उपचार तालिम शुक्रबारदेखि सुरु भएको छ। “मानवताका लागि एक्यवद्ध होऔं” भन्ने मूल नाराका साथ स्थानीय रेडक्रसको सभाहलमा सुरु भएको यस तालिमको मुख्य उद्देश्य विपद् तथा दुर्घटनाका समयमा तत्कालै मानिसको जीवन बचाउन सक्ने दक्ष जनशक्ति तयार पार्नु रहेको छ। गर्मी मौसमको प्रवाह नगरी स्थानीय टोल विकास संस्थाका अध्यक्ष, प्रतिनिधिहरू तथा महिला स्वास्थ्य स्वयंसेविकाहरूको उल्लेख्य सहभागितामा तालिमको उद्घाटन सत्र सम्पन्न भएको हो।

तालिम उद्घाटन कार्यक्रममा बोल्दै प्रमुख अतिथि एवं रत्ननगर नगरपालिका वडा नम्बर २ का वडा अध्यक्ष राजेन्द्र प्रसाद घिमिरेले विपद् र दुर्घटना बाजा बजाएर नआउने भएकाले यस प्रकारको सीप प्रत्येक नागरिकका लागि अनिवार्य भएको बताउनुभयो। उहाँले विशेषगरी घरको भान्सा र गृहस्थी सम्हाल्ने दिदीबहिनीहरूका लागि यो तालिम झनै बढी संवेदनशील र फलदायी हुने विश्वास व्यक्त गर्नुभयो। स्थानीय सरकारको तर्फबाट रेडक्रसका मानवीय कार्यलाई सधैं सहयोग रहने प्रतिबद्धता जनाउँदै उहाँले सहभागीहरूलाई पूर्ण ध्यान दिएर सीप सिक्न आग्रह गर्नुभयो।

विशिष्ट अतिथि एवं वडा नम्बर ९ का वडा अध्यक्ष अनन्त अधिकारीले समाजमा तत्काल आइपर्ने दुर्घटनाको न्यूनीकरणका लागि यो अमूल्य अवसर भएको चर्चा गर्नुभयो। आर्थिक वर्षको अन्त्यमा बजेटको सीमा भए तापनि मानवीय सेवाका क्षेत्रमा वडाले सधैं हातेमालो गर्ने उहाँले स्पष्ट पार्नुभयो। यस्तै, नेपाल रेडक्रस सोसाइटी पालिका तदर्थ समितिका नवगठित संयोजक रामचन्द्र पौडेलले रेडक्रस अहिले देशको नयाँ संघीय संरचना अनुसार नै अघि बढिरहेको जानकारी दिँदै छिमेकमा विपद् पर्दा सबैभन्दा पहिले उभिने व्यक्ति स्थानीय बासिन्दा नै हुने भएकाले यो ज्ञान अत्यन्तै छरिलो र व्यवहारिक हुने प्रष्ट पार्नुभयो।

तालिमका मुख्य प्रशिक्षक एवं नेपाल रेडक्रस सोसाइटी चितवन जिल्ला शाखाका उपमहामन्त्री महेश्वर थपलियाले घरको भान्सामा काम गर्दा हुने साना चोटपटक, आगलागी, ग्यास लिक, वा बाटोघाटोमा हुने दुर्घटनामा सही निर्णय लिन नसक्दा धेरैले ज्यान गुमाउनु परेको यथार्थ सुनाउनुभयो। उहाँले प्राथमिक उपचारको उचित ज्ञानले मानिसलाई अस्पताल पुऱ्याउनु अघि नै रक्ताल्पता र अकाल मृत्युबाट जोगाउने हुनाले रेडक्रसले ‘घरघरमा एक प्राथमिक उपचारक’ तयार पार्ने अभियान चलाएको बताउनुभयो। तीन दिनसम्म चल्ने यस तालिममा सैद्धान्तिक ज्ञानका साथै प्रकृयागत र व्यावहारिक परीक्षा समेत लिइने र सफल हुनेलाई मात्र प्रमाणित प्रमाणपत्र प्रदान गरिने तिक्त सत्य पनि उहाँले सहभागीहरूमाझ राख्नुभयो।

कार्यक्रममा स्वागत मन्तव्य राख्दै उपशाखाका कोषाध्यक्ष चन्द्रकान्त ओझाले घरको कामभन्दा बढी महत्व दिएर समयमै हलमा उपस्थित हुनुभएका सम्पूर्ण सहभागी तथा अतिथिहरूलाई धन्यवाद ज्ञापन गर्नुभएको थियो। रत्ननगर उपशाखाकी कार्यवाहक सभापति अनु गौतमको सभापतित्वमा सम्पन्न भएको उक्त उद्घाटन सत्रको सञ्चालन उपशाखाका सचिव युवराज आचार्य ‘राजन’ ले गर्नुभएको थियो। कार्यक्रममा रेडक्रसका पूर्व सचिव तथा राष्ट्रिय प्रशिक्षक निता ढकाल, उपसचिव हुतराज पन्त, उपकोषाध्यक्ष बलभद्र घिमिरे, वडा नम्बर ४ की वडा सदस्य बबिता चौधरी, विशिष्ट सदस्य नवराज तिमिल्सिना लगायतको आतिथ्यता रहेको थियो भने रेडक्रसका सात सिद्धान्तको वाचन सदस्य गङ्गा सुवेदीले गर्नुभएको थियो। कार्यवाहक सभापति गौतमले स्रोत साधनको अभावका बीच पनि स्थानीय सरकारको सहयोगमा विपद् व्यवस्थापनका यस्ता प्रभावकारी कार्यक्रमहरूलाई निरन्तरता दिइने दृढता व्यक्त गर्नुभयो।