रत्ननगर, जेठ ११
पूर्वी चितवनको अग्रणी शैक्षिक संस्था न्यु क्यापिटल कलेजले आफ्नो स्थापनाको २५ औँ वर्ष अर्थात् ‘रजत जयन्ती’ को अवसर पारेर वर्षैभरि विभिन्न सिर्जनात्मक तथा सामाजिक उत्तरदायित्वका कार्यक्रमहरू सञ्चालन गरिरहेको छ। यसै क्रममा, आज कलेज परिसरमा महानायक राजेश हमालसँग एक विशेष अन्तरक्रिया कार्यक्रम सम्पन्न भएको छ।
कलेजका प्राचार्य भूपेन्द्र धितालले सहजीकरण गर्नुभएको उक्त अन्तरक्रिया कार्यक्रममा महानायक हमालले आफ्नो बहुचर्चित कृति ‘युगदेखि युगसम्म’ को चर्चा गर्नुका साथै विद्यार्थीहरूलाई जीवनोपयोगी शिक्षा र उत्प्रेरणा प्रदान गर्नुभयो। कार्यक्रममा महानायक हमालले आफ्नो अभिनय यात्राको कठिन संघर्ष, परिवारको चाहनाविरुद्ध आफ्नो सपना पछ्याउँदा भोगेका चुनौती र सफलताका कथा सुनाउँदै विद्यार्थीहरूलाई अध्ययनमा दत्तचित्त भएर लाग्न प्रेरित गर्नुभयो। उहाँले शिक्षाको महत्वमाथि प्रकाश पार्दै मेहनत र परिश्रमले नै मानिसलाई शिखरमा पुर्‍याउने कुरामा जोड दिनुभयो।
कलेजका प्राध्यापक विष्णु सापकोटाले सञ्चालन गर्नुभएको सो कार्यक्रममा विद्यार्थी, अभिभावक, शिक्षक तथा कर्मचारीहरूको बाक्लो उपस्थिति रहेको थियो। कार्यक्रम निकै प्रभावकारी र प्रेरणादायी रहेको भन्दै सहभागी विद्यार्थी तथा अभिभावकहरूले खुसी व्यक्त गरेका थिए।
कार्यक्रमको अन्त्यमा महानायक हमालसँग तस्बिर खिचाउन र सेल्फी लिन विद्यार्थीहरूको निकै उत्साहजनक सहभागिता देखिन्थ्यो। यसका साथै, हमालले कार्यक्रममा उपलब्ध आफ्ना पाठकहरूका लागि पुस्तकमा हस्ताक्षर गर्दै उनीहरूसँग भलाकुसारी गर्नुभयो। महानायक हमालले विद्यार्थीहरूलाई आफ्नो करिअर निर्माणमा केन्द्रित हुन र शिक्षालाई जीवनको आधार बनाउन विशेष आग्रह समेत गर्नुभयो। रजत जयन्ती वर्षभरि यस्तै बहस, साहित्यिक र सामाजिक उत्तरदायित्वका कार्यक्रमहरू निरन्तर सञ्चालन गर्ने कलेजको योजना रहेको छ।